Wieso schaff ich gern i därä Budä?

 

Wegem Fabian? Wenn er mich abholt und merkt er isch zspot dra, dänn fahrt er i dä 30er Zone mit hundert km/h, chunt aber no knapp rechtzitig a.

Oder isch es villicht wegem Luca? Vo sinä azeichnätä Strich isch er meischtens wiit entfernt, deswägä han ich vo im fill übers Spachtlä glärnt. Meischtäns meint er dänn «jo jo das got scho» es tönt dänn halt achligä andersch wenn dä Herr Meier muäs cho.

Guät gluunt isch dä Chef eigentlich fascht immer, numä wänd öpis Gröbers falsch gmacht häsch dänn wird’s schlimmer.

Vo dänä Luca‘s gits no än zweitä, mit ihm mach ich meischtens nur so Chlinigkeitä. Zum Bispiel hät er ämol ä Tür mössä aschribä und ufäm Bau frögsch dich dänn , isch das jetzt ä 1 oder ä 7.

Es chönnt au wegem Raffi si, er macht immer alles korrekt, «das dänkt er zumindäscht». Ich bin zwor immer no dä Meinig min Schäflär Stift isch gar nöd so schlächt aber ich han lernä mössä dä Raffi hät halt immer Recht.

Möglicherwies isch es au wegem Elias, will irgendwie weiss er nöd wiä mä Dart spielt, das mer ufs Bull und nöd ufs Trippelzwanzgi zielt.

Wegem Roman chönts au no si, wenn ich mit im gschaffät han schlof ich am End vom Tag fascht ii.

Abär schlussendlich muäs ich sägä:

D‘Lehr will ich do machä wäge dä coolä Mitarbeiter und wägäm Arbätsklima däswägä.

Das isch nämlich än bunt zämä gwürlätä Hufä vo Chaotä und ich findä do pass ich supär dri.

 

Marlon Kieper

07.10.2022